Грамадскае аб’яднаньне “Беларускае добраахвотнае таварыства аховы помнікаў гісторыі і культуры” па-старому занепакоена лёсам гісторыка-культурных каштоўнасьцей гістарычнага цэнтру г. Менска – комплексу пабудоў Бернардынскага кляштара па вул. Кірыла і Мятода, дд. 6 і 8, а таксама перспектыўным добраўпарадкаваньнем зямельнага пляца на месцы былой Сьвята-Духаўскай царквы, унікальнага помніка рэнесанснай эпохі, гвалтоўна перабудаванай у друг. пал. 19 ст. і ўрэшсьце зьнішчанай у 30-я гг. 20 ст., запланаваным зносам пад новую забудову Козыраўскіх могілак.

Рашэньне міжведамственай камісьсіі па пытаньню рэканструкцыі бернардынскіх муроў ад 23.04.2007 г., пра што паведамлена ў лісьце Дзяржаўнага сакратарыята Савета Бясьпекі Рэспублікі Беларусь ад 21.06.2007 г. № 21-04/535-19, не выклікае даверу, бо праведзена яно без прыцягненьня грамадскасьці, незалежных спецыялістаў у галіне аховы гісторыка-культурнай спадчыны, нават не былі запрошаны прадстаўнікі Таварыства.

Зноў жа, без грамадскага абмеркаваньня, прынята рашэньне па так званае “добраўпараўпарадкаваньне” пляцу Сьвятадухаўскай царквы, якое прывядзе да зьнішчэньня культурнага пласту і нават падмуркаў царквы камунікацыямі фантана, а руйнаваньне могілак увогуле можна лічыць актам вандалізму і сьвятатацтва.

Найбольшы клопат выклікаюць безадказныя дзеяньні шэрагу дзяржслужачых, накіраваныя на зьнішчэньне гісторыка-культурнай спадчыны пад эгідай “рэканструкцыі” і “добраўпарадкаваньня”, у той час калі дзяржава і яе кіраўніцтва афіцыйна дэкляруюць клопат пра захаваньне матэрыяльнага і духоўнага багацьця Рэспублікі Беларусь, разьвіцьцё турызму, у тым ліку, у першую чаргу, на груньце багатай беларускай гісторыка-культурнай спадчыны.

Такія дзеяньні дэскрыдытуюць дзяржаўную палітыку і органы дзяржаўнай улады не толькі за межамі нашай дзяржавы, але і сярод беларускіх грамадзян.

Для вырашэньня склаўшайся тэндэнцыі, калі гісторыка-культурная спадчына прыносіцца ў ахвяру вузкакелейных інтарэсаў, Таварыства патрабуе ў выкананьні артыкула 4 Закона Рэспублікі Беларусь “Аб ахове гісторыка-культурнай спадчыны” увесці прадстаўніка нашага грамадскага аб’яднаньня ў склад Навукова-метадычнай рады Міністэрства культуры Рэспублікі Беларусь, усе праекты рэстаўрацыі, рэканструкцыі і прыстасаваньня аб’ектаў гісторыка-культурнай спадчыны выносіць на шырокае грамадскае абмеркаваньне, у тым ліку, паўторна разгледзіць праекты па гістарычных цэнтрах Менска і Гародні з удзелам прадстаўнікоў Таварыства, іншых грамадскіх арганізацый, незалежных спецыястаў у галіне захавання гісторыка-культурнай спадчыны, рэлігійных суполак і проста грамадскасці.

Старшыня Рэспубліканскага савета
Антон Астаповіч