Адкрыты ліст Прэзідэнту Рэспублікі Беларусь
А.Р.Лукашэнка
Шаноўны Алякандр Рыгоравіч!
11 красавіка 2008 г. па Вашым распараджэньні адбыўся дэмантаж помніка
Максіму Багдановічу з мэтай яго пераносу на іншае месца. Нашае грамадзкае
аб'яднаньне разумее, што гэтае распараджэньне Вы аддалі згодна шматлікіх
матэрыялаў, якія падрыхтавалі для Вас праектыроўшчыкі рэканструкцыі
будынку Нацыянальнага тэатру оперы і балета, адказныя супрацоўнікі
Міністэрства культуры Рэспублікі Беларусь і Менскага гарадзкога выканаўчага
камітэту.
Вышэйназваныя ўстановы самастойна не прынялі рашэньне па помніку ў
сувязі з тым, што яно непасрэдна парушае Закон Рэспублікі Беларусь
"Аб ахове гісторыка-культурнай спадчыны", бо помнік Максіму
Багдановічу з'яўляецца нерухомай матэрыяльнай гісторыка-культурнай
каштоўнасьцю 2-й катэгорыі, якая ўнесена ў Дзяржаўны сьпіс гісторыка-культурных
каштоўнасьцей пад шыфрам 712Ж000211. І рашэньне па яму павінна было
выносіцца ў адпаведнасьці з вышэйназваным законам і іншымі нарматыўна-прававымі
актамі, якія акрэсьліваюць кола ўпаўнаважаных дзяржаўных устаноў і
службовых асобаў, адказных за дадзеную галіну дзейнасьці і іх кампетэнцыю
ў вырашэньні дадзеных праблем.
Аўтара помніка, скульптара Сяргея Вакара, зараз ўжо няма ў жывых,
а яго суаўтары - архітэктары помніка Леанід Маскалевіч і Юры Казакоў,
якія павінны згодна прынятым нарматыўна-прававым актам ажыцьцяўляць
аўтарскі нагляд, выступілі супраць пераносу помніка.
Перанос помніка на іншае месца, ў цень будынку тэатру, сказіць яго
маштаб, ён стане дробным на фоне гмаху тэатра, дзе ўсталявалі новыя
скульптуры і гмахаў навакольных дамоў. Спатрэбцца іншы, большы пастамент.
Ды і ўвогуле дэвальвуецца яго вартасьць як нерухомай гісторыка-культурнай
каштоўнасьці.
Дазволю сабе нагадаць Вам зьмест некаторых пунктаў Артыкула 28 падпісанага
Вамі Закону "Аб ахове гісторыка-культурнай спадчыны Рэспубллікі
Беларусь" ад 09 сьнежня 2006 г:
Артыкул 28. Забеспячэнне захавання нерухомых матэрыяльных гiсторыка-культурных
каштоўнасцей
1. Для забеспячэння захавання нерухомых матэрыяльных гiсторыка-культурных
каштоўнасцей (iх навакольнага асяроддзя i зон аховы) перамяшчэнне
гэтых нерухомых матэрыяльных гiсторыка-культурных каштоўнасцей, знiшчэнне
або стварэнне пагрозы знiшчэння нерухомых матэрыяльных гiсторыка-культурных
каштоўнасцей (iх навакольнага асяроддзя i зон аховы), прычыненне iм
шкоды або стварэнне пагрозы яе прычынення, пагаршэнне тэхнiчнага стану
або стварэнне пагрозы яго пагаршэння, а таксама навукова не абгрунтаванае
змяненне i пагаршэнне ўмоў успрымання гэтых нерухомых матэрыяльных
гiсторыка-культурных каштоўнасцей (iх навакольнага асяроддзя i зон
аховы) забараняюцца, за выключэннем выпадкаў, прадугледжаных пунктамi
2 i 3 гэтага артыкула.
2. Перамяшчэнне нерухомай матэрыяльнай гiсторыка-культурнай каштоўнасцi
дапускаецца ў выключных выпадках толькi з дазволу Мiнiстэрства культуры
Рэспублiкi Беларусь пры немагчымасцi яе захавання на месцы i наяўнасцi
навукова-праектнай дакументацыi на выкананне рэстаўрацыйна-аднаўленчых
работ на гэтай каштоўнасцi з мэтай яе аднаўлення ва ўмовах, прыдатных
для забеспячэння захавання нерухомай матэрыяльнай гiсторыка-культурнай
каштоўнасцi. Немагчымасць захавання нерухомай матэрыяльнай гiсторыка-культурнай
каштоўнасцi на месцы ўстанаўлiваецца Навукова-метадычнай радай.
3. Стварэнне пагрозы знiшчэння нерухомай матэрыяльнай гiсторыка-культурнай
каштоўнасцi (яе навакольнага асяроддзя i зон аховы) i прычынення ёй
шкоды, пагаршэнне тэхнiчнага стану або стварэнне пагрозы яго пагаршэння,
а таксама навукова не абгрунтаванае змяненне i пагаршэнне ўмоў успрымання
нерухомай матэрыяльнай гiсторыка-культурнай каштоўнасцi (яе навакольнага
асяроддзя i зон аховы) дапускаюцца толькi па рашэнню Савета Мiнiстраў
Рэспублiкi Беларусь, калi iх неабходнасць выклiкана правядзеннем мерапрыемстваў
па лiквiдацыi вынiкаў стыхiйных бедстваў, катастроф, ваенных дзеянняў.
Няўжо, паважаны Аляксандр Рыгоравіч, рэканструкцыя будынку Нацыянальнага
тэатру оперы і балету з'яўляецца стыхійным бедствам, ці катастрофай,
ці ваеннымі дзеяньнямі. Хіба што будаўніцтва новага пампезнага фантану,
якое няблага дасьць зарабіць шматлікім зацікаўленым колам, і з'яўляецца
стыхійным бедствам для нашай нацыянальнай спадчыны, як такім жа
бедствам зараз з'яўляецца недобрасумленнасць і прававы нігілізм
цэлага шэрагу дзяржаўных служачых.
Менавіта купка недобрасумленных чыноўнікаў, ігнаруючы нацыянальнае
заканадаўства, для ажыццяўленьня сваех шкурных вузкакелейных інтарэсаў,
уцягнула і Вас у працэс парушэньня заканадаўства, тым самым усклаўшы
на Вас поўную адказнасьць за гэта. Такім чынам, прыкрыўшыся Вамі,
і непасрэдна пасадай Прэзідэнта Рэспублікі Беларусь, яны вывелі
з-пад адказнасьці саміх сабе.
Пазыцыя іх яскрава сьведчыць, што прэстыж беларускае дзяржавы і
яе Прэзідэнта, як і праблемы выкананьня заканадаўства, цікавяць
іх меньш за ўсё, калі справа даходзіць да вырашэньня прыватных інтарэсаў.
Беларускае добраахвотнае таварыства аховы помнікаў гісторыі і культуры
неаднаразова зьвярталася да Вас з праблемамі ігнараваньня нацыянальнага
заканадаўства, што прыводзіць да руйнаваньня нашых нацыянальных
здабыткаў. На жаль, на ўсе звароты было фармальнае рэагаваньне апарату
Вашае адміністрацыі.
Зараз мы зьвяртаемся да Вас з просьбай адмежавацца ад купкі махляроў
"ад дзяржаўнага кіраваньня", прыцягнуць іх да адказнасьці
за грубае парушэньне заканадаўства і прыняць узважанае рашэньне
па вяртаньню помніка Максіму Багдановічу на тое месца, дзе ён прастаяў
звыш 20-і год і павінен стаяць адпаведна літары і духу закону.
Такія Вашы дзеяньні знойдуць падтрымку і паразуменьне ў шырокіх
слаёў нашага беларускага грамадзтва, для якога Багдановіч - адзін
з асноўных сымбалеў нашай Бацькаўшчыны.
З павагай
Старшыня Прэзідыюма А.У.Астаповіч
|
