Сёння, 14 сакавіка 2008г. зьнішчаны яшчэ адзін аўтэнтычны помнік Гістарычнага цэнтра Менску, унесены ў Дзяржаўны спіс гісторыка-культурных каштоўнасцяў Рэспублікі Беларусь – жылы будынак XIXст па вул. Койданаўская (цяпер Рэвалюцыйная), 17.

Гэты будынак зьяўляўся выдатным прыкладам перыметральнай вулічнай забудовы гістарычнага квартала старога Менску, унесены не толькі ў акадэмічнае выданьне “Помнікі архітэктуры Мінска XVII-пачатку XXст”1984г. , ці ў складзе гістарычнага квартала, які прымыкае да Верхняга Горада (пратакол НМР №64 ад 27 сакавіка 2001), але і адрасна, пратаколам №107 навукова-мэтадычнай рады Мінкультуры ад 29 сакавіка 2005г. ў пералік аб’ектаў Дзяржаўнага спісу сталіцы.

Спецыяльным Рашэньнем Мінгарвыканкама ад 4 жніўня 2005г. №1360 у выкананьне пастановы Савета Міністраў Рэспублікі Беларусь ад 12 кастрычніка 2004г. №1271 “Аб зацвярджэнні комплекснай праграмы рэканструкцыі, рэстаўрацыі, аднаўленьня і добраўпарадкаваньня Гістарычнага цэнтра г.Мінска”, гэты будынак быў зацьварджаны і ў складзе мінгарвыканкомаўскага спіса будынкаў і збудаваньняў, якія з’яўляюцца аб’ектамі гісторыка-культурнай спадчыны ў межах Гістарычнага цэнтру Менска.

З 2004 па 2007 год на гэтым аб’екце агульнай плошчы 392 кв.м. вяліся аднаўленчыя работы: быў адрамантаваны дах, цалкам замененая сталярка, праведзеныя рамонтныя работы. Урэшце ня так даўно быў неўзабаве прыбраны плот і бэтонныя блокі, якія некалькі год абгароджвалі пляцоўку.
І вось...
Няўжо адміністрацыя гатовая ўзяць на сябе адказнасць за гэтае злачынства?

Вайна супраць гісторыі краіны і парушэнне ўласнага заканадаўства працягваюцца...

Намеснік начальніка ўпраўлення па ахове гісторыка-культурнай спадчыны і рэстаўрацыі Міністэрства культуры Рэспублікі Беларусь сп. Ігар Чарняўскі падчас тэлефоннай размовы са старшынём Прэзідыюма Беларускага добраахвотнага таварыства аховы помнікаў гісторыі паведаміў, што пра знос помніка яму нічога не вядома і ў даволі цынічнай форме парэкамендаваў высвятленнем абставін гвалту займацца грамадскасці.

На пытанне сп. Астаповіча пра адсутнасць захадаў па праблеме з боку ўпраўлення па ахове, і асабіста сп. Чарняўскага, як упаўнаважанай у гэтай галіне асобы, ён адказаў, што падсправаздачны не грамадскасці, а міністру культуры, які да працы яго, гэта значыць сп. Чарняўскага, прэтэнзій не мае.

Літаральна праз гадзіну пасля тэлефоннай размовы сп. Астаповіч у Будаўнічым трэсце № 7, які з’яўляецца падрадчыкам па правядзенню дэмантажу будынку, азнаёміўся з праектна-каштарыснай дакументацыяй па разборцы помніка, у пакеце якой знаходзяцца ўсе дазваляльныя дакументы, у тым ліку і дазвол Міністэрства культуры, якім руйнаванне і было санкцыявана.

У гэтай сітуацыі Таварыства звярнулася ў Генеральную пракуратуру Рэспублікі Беларусь с хадайніцтвам пра ўзбуджэнне крымінальнай справы па факту грубага парушэння Закону аб ахове гісторыка-культурнай спадчыны, праінфармавала пра парушэнні Камітэт дзяржаўнага кантролю, Адміністрацыю прэзідэнта і запатрабавала ад Міністэрства культуры і Менгарвыканкаму пісьмовых тлумачэнняў па дадзенаму факту.

І апошняя рэмарка. Вось такі падаруначак нашыя ўлады падклалі нам да Міжнароднага дню помнікаў і гістарычных мясцін, які будзе святкавацца 18 красавіка.

Уладзімір Папруга,
Антон Астаповіч